Informative Bulletins
Informative bulletin nr.20
31st March 2010 (in Macedonarmân language)a pdf version in Macedoarmân language can be downloaded here
Sâmbâtâ, tu 27-li di Martsu 2010, Ohrida (Ex Ripublica Iugoslavâ Makedonia), s-dizvârti Adunarea Ghenerala a Consillui Armânjiloru (Makedonarmânjiloru), iu loarâ parti diligatslji pitricuts di sutsatili ditu Arbinishii, Vâryârii, Ex Rip.Iugoslavâ Makidunii, Rumânii, Frântsii, Ghirmânii, tsi suntu membri tu Consilu, cata cumu sh-riprizintantsâ di la alti sutsati tsi nu suntu membri tu Consilu (cumu easti Sutsata Armânjiloru di Veria) cari avurâ haraua sh-vrearea s-tinjiseascâ cu yinearea a loru aestâ adunari ghenerala a consillui.
Fu aleptu Ohrida loclu alishtei adunari sh-ti furnjia câ Dumânicâ, tu 28-li di Martsu, ahurhi unu seminaru (Easter Seminar) YEN (Youth European Nationalities), andreptu deadunu di tinirilji armânji di la Consillu a Tiniriloru Armânji ditu Ex Rip.Iugoslava Makidunia, Rumânia, Arbinishia, membri la YEN. Ti itia câ la aestâ andamusi gheneralâ di aradâ a consillui loarâ parti sh-multsâ armânji tsi nu suntu membri tu consilu, adunarea avu tu ahurhitâ unâ protâ parti infurmativâ, dishcljisâ ti tuts, parti iu s-dizvârtirâ muabets andicra di câftarea tsi u bâgă Consillu Armânjiloru (Makedonarmânjiloru) aoa sh-unu anu Strasburg, la Consillu ali Evropâ, muabets andicra di Andamusea Armânjiloru di estanu, tu 15-li di Agustu, Muscopoli, cumu shi muabets andicra di andridzearea di unu Congresu tu yinitorlu aprucheatu.
Andicra di câftarea tsi u featsi CA Strasburg tra s-hibâ aprucheatu la Consillu ali Evropâ ca OING cu harea di statutu participativu, CA va s-da hâbari ti mass-media armâneascâ pritu unu shcurtu bulitinu infurmativu ti soia cumu s-dizvârti tutu aestu protsesu, dupu tsi va s-aproachi di Strasburg apandasea ofitsialâ di la Directsiunea Gheneralâ OING.
Tu tsi mutreashti andamusea di Muscopoli, s-aleapsi unu comitetu di organidzari tsi va s-hibâ cumândâsitu di prezidentulu a Consillui Armânjiloru (Makedonarmânjiloru), comitetu cari va s-hibâ andrupâtu tu lucurlu di andridzeari sh-di tinirilji di la Consillu a Tiniriloru Armânji ditu Arbinishii, Ex Rip.Iugoslavâ Makidunia, Rumânia.
Dumânicâ, tu 28-li di Martsu, participantsâlji la adunarea gheneralâ a CA avurâ haraua s-lja parti sh-la dishcljidearea a Seminarlui YEN. Aestu seminaru, cari ti prota oara s-dizvârti tu unu locu iu bâneadzâ sh-multsâ armânji, easti sh-unu semnu câ tu aeshtsâ ditu soni yinyits anji di cilâstâseri sh-activităts niacumtinati trâ prumuvarea axiiloru culturali armâneshtsâ, Armânamea ari amintatâ unu bârnu vurtosu di tiniri tsi cu multâ pirifanji suntu apufusits s-ducâ nâinti isturia mudernâ di ridishtiptari a Armânamiljei, ahurhitâ aoa sh-cama di 30 di anji.
Tu idyia dzuua di Dumânicâ, tu bitisitâ, tinirilji Armânji ditu Ex Rip.Iugoslavâ Makidunia dishcljisirâ proyrama di folcloru cu giocuri armâneshtsâ. Tu soni, pareia di tiniri di la Sutsata Armânjiloru di Veria, tsi deadunu cu cumândâsearea sutsatiljei, furâ câlisiti la aestâ andamusi, n-aspusirâ nica unâ oarâ mushuteatsa sh-livindeatsa a gioclui safi armânescu ditu Gârtsii.
Informative bulletin nr.19
15th March 2010 ((in Macedonarmân language)a pdf version in Macedoarmân language can be downloaded here
Tu 01-lu di Martsu 2010, alânci tu dzuuarlu “Cuget Liber” di Custantsa / Rumânii, unu articulu (“Aromânii din Albania refuză să devină masa de manevră pentru revendicări teritoriale”), tu cari autoarea, Alina Bârgăoanu – Vasiliu, fuvirseashti sh-cacuzburashti Consillu Armânjiloru câtâ cumu sh-alti sutsati armâneashtsâ tsi cilâstâsescu trâ avigljearea a limbâljei sh-a culturâljei armâneascâ.
Trâ unâ limbidzari, cumu sh-trâ unâ dealihea infurmari a adyivâsitoriloru alushtuiu cotidianu, aclo iu alânci articullu numâsitu ma-ndzeanâ, tu tsi mutreashti tuti atseali tsi furâ arâdâpsiti di autoarea articullui, cumândâsearea Consillui Armânjiloru andreapsi unâ carti, tsi aua sh-ndauâ dzâli lj-u pitricu a redactorlui shef alushtuiu dzuuaru, ca unu “ndreptu la replicâ” , pâlâcârsinda-lu ta s-da cali trâ alânceari.
Trâ infurmarea ali mass-media armâneascâ , aflats tu documentlu pdf, apridusâ tu limba armâneascâ, aestâ carti. Trâ atselji tsi acâkisescu ghini limba rumânâ dămu tu soni sh-cartea orighinalâ, ashi cumu fu pitricutâ la dzuuarlu “Cuget Liber”.
